ABOGADO BOKKES TA KONDENA POLIS KU A USA VIOLENSIA EKSESIVO DURANTE DETENSHON
Extra, 11 oktober 2006

WILLEMSTAD ,- Abogado Bokkes a kondená e forma kon polis a usa violensia eksesivo i sin motibu na momentu di detenshon di su kliente Ramphis "Dòli" Romano.

Dia 30 di desèmber, Dòli ta keda detené den su kas na Kanga. Ta buska Dòli pa dos kaso di atrako kometé. Segun ' e polis Rojer a deklará ku nan a hana informashon ku Dòli lo ta na e kas den Kanga. Ora nan a yega, e akusado lo mester a trata di kore bai, pero nan ta sa di detené. Dado momentu segun e polis Rojer, algun hómber a kuminsá rondon'é, i aki e akusado a hana chèns di los for di dje. Na momentu e akusado tabata kore bai, segun e agente polisial, a grita e akusado pa para, pero esaki a sigui kore. Rojer a los dos bala di atvertensia den laira. Pero Dòli ta sigui kore i aki e polis ta los un tiru dirigí riba Dòli ku ta alkans'é den su bèl di pia.

Investigashon hasi riba deklarashon dje agente polisial, e ta bisa di a tira riba un distansia di 5 pa 7 meter leu for di e akusado, pero mas despues ta kambia esaki indikando ku tabata riba distansia korto el a los bala.
Pero Dòli ta bisa ku e polis a kue tene i los un bala, masha trankil, na su pia. Netamente esaki ta loke ku defensor di Dòli, Mr. Bokkes a indiká na korte ayera, esta ku e polis Rojer a tira e a kusado riba un distansia dentro di 1 meter.

Segun e abogado, e agente polisial a aktua kontra di reglanan di servisio, i manera kóbói, sin un chaleco anti bala a bai detené Dòli. Deliberadamente e akusado mes a hinka su kurpa den peliger.

Mas aleu e abogado a indiká ku ta vários deklarashon e agente polisial a duna riba e tiramentu di Ramphis. Tambe kada biaha segun ku reshèrshinan tabata traha riba e kaso, e agente polisial tabata kambia su deklarashon.

Outoridatnan a konfiská e karson dje akusado despues di su detenshon, pero misteriosamente e karson ta pèrdè. E karson lo a sirbi komo prueba pa trese klaridat riba e distansia dentro di kual e polis a tira riba su kliente. Mas aleu e abogado a sigui bisa ku e agente polisial por a aktua otro tambe, dor di bui man dje akusado. Di un agente polisial ta spera ku e ta aktua di otro forma. E abogado a pidi korte pa - apsolv'é su kliente di tur akusashon, mirando e forma kon detenshon di su kliente a bai.